हट्टा / हिंगोली:
लातूर जिल्ह्यातील एका गंभीर गुन्ह्यातील आरोपीला अटक करण्यासाठी गेलेल्या लातूर स्थानिक गुन्हे शाखा (LCB) आणि स्थानिक हट्टा पोलिसांच्या संयुक्त पथकावर आरोपीसह त्याच्या कुटुंबीयांनी लोखंडी रॉड आणि काठ्यांनी प्राणघातक हल्ला केल्याची थरारक घटना समोर आली आहे. हिंगोली जिल्ह्यातील पळशी (ता. वसमत) येथे २९ ऑक्टोबर २०२६ रोजी मध्यरात्रीच्या सुमारास हा प्रकार घडला. या हल्ल्यात सहाय्यक पोलीस निरीक्षक (API) गंभीर जखमी झाले असून, आरोपी महिलांनी पोलिसांच्या डोळ्यात मिरचीपूड फेकून शासकीय वाहनाची प्रचंड तोडफोड केली आहे. या घटनेमुळे पोलीस दलात तीव्र खळबळ उडाली आहे.
पोलीस मदतीसाठी हट्टा ठाण्यात दाखल
लातूर जिल्ह्यातील देवणी पोलीस ठाण्यात दाखल असलेल्या गु.र.न ३२०/२०२५, कलम ३३१ (४), ३०५ (अ) भारतीय न्याय संहिता (BNS) मधील फरार आरोपी राजू मोहन शिंदे (रा. पळशी, ता. वसमत, जि. हिंगोली) हा पळशी गावात असल्याची माहिती लातूर पोलिसांना मिळाली होती. या माहितीच्या आधारे लातूर स्थानिक गुन्हे शाखेचे सहाय्यक पोलीस निरीक्षक पांडुरंग माने, पोलीस उपनिरीक्षक अमर केंद्रे, पोलीस अंमलदार आणि महिला पोलीस अंमलदार यांचे पथक २८ ऑक्टोबर रोजी रात्री हट्टा पोलीस ठाण्यात पोहोचले. तेथील स्थानिक परिसराची माहिती असलेल्या कर्मचाऱ्याची मागणी केल्यानंतर, हट्टा पोलीस ठाण्याचे पोलीस हवालदार संदीप चव्हाण (बकल नंबर ९६४) यांना रात्री २२:०१ वाजता लातूर पोलीस पथकासोबत रवाना करण्यात आले.
मध्यरात्री आरोपीच्या घरी छापा आणि प्राणघातक हल्ला
मिळालेल्या माहितीनुसार, २९ ऑक्टोबर रोजी मध्यरात्री ००:२० वाजताच्या सुमारास हे संयुक्त पोलीस पथक मौजे पळशी येथील आरोपी राजू मोहन शिंदे याच्या घरावर छापा टाकण्यासाठी गेले. पोलिसांनी राजू शिंदे याला ताब्यात घेण्याचा प्रयत्न केला असता, तिथे उपस्थित असलेल्या त्याच्या नातेवाईकांनी पोलिसांशी हुज्जत घालण्यास सुरुवात केली.
पाहता पाहता राजू मोहन शिंदे, सुदर्शन मोहन शिंदे, सचिन मोहन शिंदे, विकी मोहन शिंदे आणि इतर ३ ते ४ महिला व पुरुषांनी बेकायदेशीर जमाव (गैरकायद्याची मंडळी) जमवला. सपोनि पांडुरंग माने यांना जिवे मारण्याच्या उद्देशाने आरोपींनी लोखंडी रॉडने त्यांच्या डोक्यात थेट प्रहार केला. या भीषण हल्यात सपोनि माने यांच्या डोक्याला गंभीर दुखापत झाली आणि ते रक्ताच्या थारोळ्यात पडले. याच वेळी मध्यस्थी करणाऱ्या पोलीस उपनिरीक्षक अमर केंद्रे यांच्या डोक्यातही काठीने जबर मारहाण करण्यात आली.
महिलांनी डोळ्यात फेकली मिरचीपूड, शासकीय वाहनाची तोडफोड
पोलीस पथक बचावाचा प्रयत्न करत असतानाच, जमावातील ३ ते ४ अज्ञात महिलांनी सोबत आणलेली मिरचीपूड पोलीस अंमलदार आणि महिला अंमलदारांच्या डोळ्यात फेकली. डोळ्यात मिरचीपूड गेल्याने पोलिसांना काहीच सुचेनासे झाले, याचा फायदा घेत आरोपींनी पोलिसांना लाथाबुक्क्यांनी बेदम मारहाण केली आणि अत्यंत शेलक्या भाषेत शिवीगाळ केली. एवढ्यावरच न थांबता आरोपींनी पोलिसांच्या शासकीय वाहनावर दगडफेक करत त्याची मोठ्या प्रमाणावर तोडफोड केली आणि पोलिसांना शासकीय कर्तव्य बजावण्यापासून रोखून मोठा अडथळा निर्माण केला.
हट्टा पोलीस ठाण्यात गुन्हा दाखल, आरोपींच्या शोधासाठी पथके रवाना
या घटनेनंतर जखमी पोलिसांना तातडीने उपचारासाठी रुग्णालयात दाखल करण्यात आले आहे. याप्रकरणी हिंगोली स्थानिक गुन्हे शाखेचे पोउपनि अमर सुरेश केंद्रे यांनी हट्टा पोलीस ठाण्यात येऊन रीतसर फिर्याद दिली. त्यांच्या तक्रारीवरून आरोपी राजू शिंदे, सुदर्शन शिंदे, सचिन शिंदे, विकी शिंदे आणि इतर महिला व पुरुषांविरुद्ध हट्टा पोलीस ठाण्यात गु.र.नं ३६५/२०२६ नुसार भारतीय न्याय संहितेच्या (BNS) कलम १३२, १०९(१), ११८(२), १२५, ११५(२), ३५२, ३५१(२), ३२४(४), १८ण(२), १९१(३), १९० अन्वये शासकीय कामात अडथळा, प्राणघातक हल्ला आणि दंगलीचा गुन्हा दाखल करण्यात आला आहे.
सदर गुन्ह्याचा पुढील तपास पोलीस उपनिरीक्षक संजय केंद्रे यांच्याकडे सोपवण्यात आला आहे. घटनेचे गांभीर्य लक्षात घेऊन हिंगोलीचे माननीय पोलीस अधीक्षक यांनी तात्काळ आदेश जारी केले असून, फरार झालेल्या सर्व आरोपींच्या मुसक्या आवळण्यासाठी पोलिसांची दोन विशेष शोध पथके तयार करून रवाना करण्यात आली आहेत. पोलीस आरोपींचा कसून शोध घेत आहेत.
